Son günlər sosial şəbəkələrdə fəaliyyət göstərən AİD Qroup şirkəti və onun qurucusu Nigar Fərhad barədə narazılıqların sayı artmaqdadır. Belə ki, Kənan Gözəlov adlı vətəndaş öz "Instagram" sosial şəbəkə hesabında paylaşdığı videomüraciətdə bildirib ki, təxminən bir il altı ay əvvəl AİD Qroupa müraciət edib və ona şirkətin qurucusu Nigar Fərhad tərəfindən altı ay ərzində viza təsdiqinin alınacağı vədi verilib.
Lakin vətəndaşın sözlərinə görə, göstərilən müddət keçməsinə baxmayaraq heç bir müsbət nəticə əldə olunmayıb. O iddia edir ki, bu müddət ərzində dəfələrlə viza müraciətlərinə rədd cavabı verilib və şirkət tərəfindən problemin həlli istiqamətində konkret nəticə əldə edilməyib.
Sosial şəbəkələrdə yayılan paylaşımlar göstərir ki, Kənan Gözəlovun səsləndirdiyi iddialar tək deyil. Müxtəlif istifadəçilər AİD Qroupun fəaliyyəti ilə bağlı narazılıqlarını ifadə edir, xidmətlərdən razı qalmadıqlarını bildirir və şirkətin fəaliyyəti barədə müxtəlif ittihamlar irəli sürürlər. Bəzi sosial şəbəkə istifadəçiləri Nigar Fərhad barəsində ağır ittihamlar səsləndirsələr də, bu iddialar müvafiq dövlət orqanları və ya məhkəmə tərəfindən təsdiqlənmiş hüquqi fakt hesab edilmir.
AİD Qroup tərəfindən törədilən eyni dələduzluq halı ilə digər vətəndaş Elvin Bayramzadə də şikayətçi olub. O, da AİD Qroupa müraciət edib və onu da şirkət qurucusu Nigar Fərhad digərləri kimi aldadıb.
Məsələ ilə bağlı media nümayəndələri və xəbər portalları tərəfindən jurnalist araşdırmalarına başlanıldığı bildirilir. Araşdırmalar zamanı müxtəlif şəxslərin şirkətin fəaliyyəti ilə bağlı şikayət və iddiaları toplanır, səsləndirilən məlumatların dəqiqliyi araşdırılır. Redaksiyamız da mövzu ilə bağlı daxil olan müraciətləri diqqətdə saxlayır və bütün tərəflərin mövqeyini işıqlandırmağa hazır olduğunu bildirir.
Günay Cəfərli
Paytaxt.org
