Bakı Dövlət Universitetində (BDU) baş verən hadisələr diqqət mərkəzinə düşüb. Universitetin müəllimi Nəriman Süleymanovun qəfil vəfatı, ölümündən əvvəl onun barəsində səsləndirilən ittihamlar və rektor Elçin Babayevin vəzifəsindən azad edilməsi bir sıra suallar yaradıb.
Paytaxt.org "Sfera.az"-a istinadla xəbər verir ki, BDU-nun müəllimi Nəriman Süleymanovun həyat yoldaşı, jurnalist Şərəf Cəlili onun vəfatı ilə bağlı açıqlama verib.
Jurnalist hadisəni təsdiqləyərək həyat yoldaşının ölümü ilə bağlı "O, bir rektorun qurbanı oldu" ifadəsini işlədib.
Ş.Cəlili əlavə edib ki, məsələ ilə bağlı daha sonra açıqlama verəcək və Prezidentin sərəncamına diqqət çəkib.
Qeyd edək ki, bir neçə gün əvvəl Nəriman Süleymanovun adı tələbələrə qarşı qeyri-etik davranışlarla bağlı iddialarda hallanmışdı. Həmin iddiaların mahiyyəti və onlara verilən rəsmi qiymətləndirmə barədə əlavə məlumat açıqlanmayıb.
Məlumata görə, N.Süleymanovun meyiti noyabrın 18-də Yasamal rayonunda yaşadığı mənzildə aşkarlanıb. Onun ölümü ilə bağlı Yasamal Rayon Prokurorluğunda araşdırma aparılır.
Maraqlı məqam ondan ibarətdir ki, noyabrın 19-da Prezident İlham Əliyevin sərəncamı ilə Elçin Babayev Bakı Dövlət Universitetinin rektoru vəzifəsindən azad edilib.
Beləliklə, müəllimin vəfatı, həyat yoldaşının rektorla bağlı açıqlaması və universitet rəhbərliyində baş verən dəyişiklik ictimaiyyətdə müzakirələrə səbəb olub. Bununla belə, bu hadisələr arasında birbaşa səbəb-nəticə əlaqəsinin olub-olmadığı hələlik məlum deyil.
Şərəf Cəlilinin vəd etdiyi əlavə açıqlamanın məsələyə aydınlıq gətirəcəyi gözlənilir.