Vətənə və xalqa xidmət ideyalarını həyat amalına çevirən, nəcibliyi və xeyirxah əməlləri ilə milyonların rəğbətini qazanan Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyeva müasir dövrümüzün ən nüfuzlu ictimai-siyasi xadimlərindən biridir. Onun mərhəmət, şəfqət və humanizmə əsaslanan fəaliyyəti milli-mənəvi dəyərlərin qorunmasına, Azərbaycan cəmiyyətinin sosial rifahının yüksəldilməsinə xidmət edir.
İslahatların reallaşması, milli mədəniyyətimizin dünyada təbliği, təhsil və səhiyyə sahəsində genişmiqyaslı layihələrin həyata keçirilməsi, eləcə də şəhid ailələri və qazilərə göstərilən diqqət və qayğı onun fəaliyyətinin əsas istiqamətlərindəndir. Vətən müharibəsi zamanı Ordumuza verdiyi mənəvi dəstək, milli həmrəyliyə xidmət edən çağırışları daim minnətdarlıq duyğuları ilə xatırlanır. Xalqımızın sosial rifahına hesablanan bir çox layihələrin müəllifi olan Mehriban Əliyeva birinci xanım adını şərəflə daşıyır, dünyaya müasir Azərbaycan qadınının qürur doğuran obrazını təqdim edir.
Paytaxt.org Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın ictimai-siyasi fəaliyyətinin əsas məqamlarına nəzər salır.
Azərbaycan xalqının böyük sevgisini qazanmış Mehriban xanım bu gün Müzəffər Ali Baş Komandan İlham Əliyevin ən yaxın silahdaşı kimi onunla çiyin-çiyinə dayanaraq Qarabağın və Şərqi Zəngəzurun dirçəldilməsində öncüllük edir. Onun Vətən və xalq qarşısındakı ən önəmli xidmətlərindən biri də Ulu Öndər Heydər Əliyevin ideyalarının həyata keçirilməsi sahəsində göstərdiyi ardıcıl səylər və reallaşdırdığı çoxsaylı layihələrdir. Sərhəd tanımayan xeyirxahlığı və nəcibliyi Mehriban Əliyevaya yalnız Azərbaycanda deyil, dünyanın müxtəlif ölkələrində də böyük rəğbət və sevgi qazandırıb. O, Azərbaycanda təhsil, mədəniyyət və səhiyyənin inkişafına verdiyi töhfələrlə yanaşı, milli maraqların beynəlxalq aləmdə müdafiəsi, sivilizasiyalararası və mədəniyyətlərarası dialoqun təşviqi istiqamətində də yorulmadan çalışır. Mehriban xanımın fəaliyyəti müasir Azərbaycan qadınının parlaq simasını dünyaya nümayiş etdirir və gələcək nəsillər üçün nümunəvi örnək kimi dəyərləndirilir.
Birinci xanım Mehriban Əliyevanın rəhbərliyi ilə 2004-cü ildən fəaliyyət göstərən Heydər Əliyev Fondu Ümummilli Liderin ideyalarının həyata keçirilməsində və onun zəngin dövlətçilik irsinin bütün dünyada tanıdılmasında əvəzsiz xidmətlər göstərir. Xalqımızın xeyriyyəçilik ənənələrinin dirçəldilərək daha geniş miqyas alması da bilavasitə Fondun prezidentinin göstərdiyi şəxsi nümunə nəticəsində mümkün olub. Fond, həmçinin Azərbaycan Respublikasının beynəlxalq nüfuzunun yüksəldilməsində fəal iştirak edir.
Mehriban Əliyevanın rəhbərliyi ilə fəaliyyət göstərən Fond onun nəcib əməl və humanist prinsiplərini əks etdirir. Əsasında mərhəmət, şəfqət və xeyirxahlıq kimi ali dəyərlər dayanan Heydər Əliyev Fondu artıq 21 ildir ki, öz prinsiplərinə sadiq qalaraq təhsil, səhiyyə, mədəniyyət, idman, elm və texnologiya, ekologiya, sosial və digər sahələrdə müxtəlif layihələr həyata keçirir. Bu təşəbbüslər cəmiyyətimiz tərəfindən hər zaman yüksək qiymətləndirilir, çünki Azərbaycan xalqı Fondun inkişafa xidmət edən uğurlu layihələrinə və Birinci vitse-prezidentin humanist, vətənpərvər və nümunəvi fəaliyyətinə güvənir.
Fondun fəaliyyəti Ulu Öndər Heydər Əliyevin ideyalarının böyük əzmlə və sədaqətlə həyata keçirildiyini təsdiqləyir. Bu əminlik təsadüfi deyil, çünki görülən işlər və Fondun bütün istiqamətlərdə qazandığı uğurlar açıq-aydın görünür. Heydər Əliyev Fondu ölkənin yaradıcı və elmi potensialının artırılmasına, uşaq müəssisələrinin infrastrukturunun inkişafına, ekoloji tədqiqatların dəstəklənməsinə, sağlam həyat tərzinin təbliğinə, elmi və mədəni konfransların, sərgilərin təşkilinə, dini tolerantlığın möhkəmlənməsinə, vətəndaş cəmiyyəti quruculuğuna və qloballaşan dünyada milli-mənəvi dəyərlərin qorunub saxlanılmasına xüsusi diqqət yetirir.
Mehriban xanım, həmçinin beynəlxalq sülh, təhlükəsizlik, mədəniyyətlərarası və dinlərarası dialoq mühitinin formalaşması və möhkəmlənməsi, tarixi mədəni irsin qorunması kimi olduqca vacib məsələlərin həllinə böyük töhfələr verir. Artıq 20 ildən çoxdur ki, Azərbaycan tarixini və mədəni irsini, ölkəmizlə bağlı həqiqətləri dünya ictimaiyyətinə çatdırmaq üçün yorulmadan fəaliyyət göstərir. Onun səylərinin nəticəsi olaraq İçərişəhər, o cümlədən Şirvanşahlar Sarayı və Qız qalası, Qobustan qayaüstü rəsmləri, Xan Sarayı ilə birgə Şəkinin tarixi mərkəzi, “Xınalıq və Köç yolu mədəni landşaftı”, eyni zamanda, Hirkan meşələri UNESCO-nun Ümumdünya İrs Siyahısına daxil edilib. Həmçinin muğam və aşıq sənətimiz, “Kamança simli musiqi alətinin hazırlanması və ifaçılıq sənəti”, “Dədə Qorqud irsi”, Azərbaycan kəlağayı sənəti Qeyri-Maddi Mədəni İrs üzrə Reprezentativ Siyahıya salınıb. Eyni zamanda, Azərbaycan 2019-cu ilin iyulunda UNESCO-nun Ümumdünya İrs Komitəsinin 43-cü sessiyasına uğurla ev sahibliyi edib.
2017-ci il fevralın 21-də Mehriban Əliyevanın Birinci vitse-prezident vəzifəsinə təyin edilməsi onun Azərbaycan dövlətçiliyinin inkişafı və möhkəmləndirilməsi naminə zəngin və fədakar fəaliyyətinin, habelə yüksək təşkilatçılıq qabiliyyətinin məntiqi nəticəsi kimi qiymətləndirilir. Mehriban xanımın o vaxt dediyi sözlər yada düşür: “Üzərimə düşən məsuliyyət olduqca böyükdür. Mən Prezidentin etimadını doğrultmalıyam və ən başlıcası isə inamı, ümidi olan insanların etimadını doğrultmalıyam”.
Azərbaycanın iqtisadi inkişafı və xalqımızın rifahı naminə milli məqsədlərə nail olmaqla bağlı üzərinə nəcib missiya və öhdəliklər götürən Birinci vitse-prezident Mehriban xanım Əliyeva ötən müddət ərzində bu yüksək və məsul vəzifədə gördüyü işlərlə dövlətimizin başçısının və xalqımızın etimadını layiqincə doğruldur. Gündəlik fəaliyyətində insansevərlik, mərhəmət, qarşılıqlı hörmət və mehribanlıq meyarlarını əsas götürür, fəaliyyətini məhz bu prinsiplər üzərində qurur və milli-mənəvi dəyərləri daim uca tutur. Onun ömür yolu sözün əsl mənasında Vətənə və xalqa xidmət nümunəsidir.
Mehriban Əliyevanın fəaliyyətində əhalinin həssas təbəqələrinin, o cümlədən məcburi köçkünlərin, şəhid ailələrinin və qazilərin problemlərinin həlli xüsusi yer tutur. Yeni yüksək vəzifədə keçirdiyi ilk müşavirəni məhz qaçqın və məcburi köçkün ailələrinin həyat şəraitinin yaxşılaşdırılmasına həsr etməsi bu diqqətin bariz nümunəsidir. Həmin müşavirədən dərhal sonra müvafiq tədbirlər planı hazırlanıb və real işlərə başlanılıb. Qısa müddət ərzində yüz minlərlə qaçqın və məcburi köçkünün mənzil-məişət şəraiti yaxşılaşdırılıb, onların sosial rifahının yüksəldilməsi istiqamətində mühüm addımlar atılıb.
Heydər Əliyev Fondu Vətən müharibəsi zamanı şəhid olan hərbçilərin ailələrini və qazilərimizi də daim diqqətdə saxlayır, onların qayğısına qalır. Fond bu kateqoriyadan olan insanların qayğıları ilə yaxından maraqlanır, onları narahat edən məsələlərin həlli istiqamətində mütəmadi tədbirlər həyata keçirir. Döyüşlərdə yaralanan hərbçilərimiz müalicə və reabilitasiya üçün Türkiyəyə göndərilib, həmçinin sağlamlıqlarını itirmiş bir qrup əsgər və zabit yüksək texnologiyalı protezlərlə təmin edilib.
Torpaqlarımızın azad olunması uğrunda mübarizəyə siyasi-mənəvi dəstək, xalqımızı milli həmrəyliyə səsləyən, şanlı Ordumuzu Qələbəyə ruhlandıran müraciət və çağırışlar, müharibədən sonra isə dövlətimizin başçısı ilə birlikdə Qarabağa çoxsaylı səfərlər, Şuşada möhtəşəm “Xarıbülbül” Musiqi Festivalının təşkili birinci xanımın xidmətləri sırasında xüsusi yer tutur. Eyni zamanda, Mehriban xanımın təşəbbüsü olan “Uşaq evləri və internat məktəblərinin inkişafı”, “Yeniləşən Azərbaycana yeni məktəb”, “Təhsilə dəstək”, “Məktəbəqədər təhsil müəssisələrinin inkişafı” və digər proqramlar təhsilin inkişafında mühüm rol oynayır. 2005-ci ildən icrasına başlanılan “Yeniləşən Azərbaycana yeni məktəb” proqramı çərçivəsində ölkə üzrə çoxsaylı məktəb binaları inşa olunub və yenidən qurulub. “Uşaq evləri və internat məktəblərinin inkişafı” proqramı çərçivəsində isə bir sıra uşaq müəssisələri əsaslı təmir edilərək müasir tələblərə uyğunlaşdırılıb.
Əhalinin sağlamlığı məsələsi də Mehriban Əliyevanın daim xüsusi diqqət göstərdiyi sahələrdəndir. Onun təşəbbüsü ilə reallaşdırılan “Diabetli uşaqlara ən yüksək qayğı”, “Talassemiyasız həyat naminə”, “Tibb müəssisələrinin yenidən qurulması və inşası” kimi bənzərsiz layihələr, bir çox xeyriyyə aksiyaları böyük rəğbətlə qarşılanır, öz müsbət nəticələrini verir. Bu çərçivədə Bakıda müasir Talassemiya Mərkəzi, Daun Sindromlu Şəxslərin Reabilitasiya Mərkəzi, Xüsusi qayğıya ehtiyacı olan uşaqlar üçün reabilitasiya Mərkəzi, Psixonevroloji Uşaq Mərkəzi və digər səhiyyə ocaqları inşa olunub və ya əsaslı şəkildə yenidən qurulub.
Azərbaycanın birinci xanımının tapşırığına əsasən, aztəminatlı ailələri və xüsusi qayğıya ehtiyacı olan şəxsləri daim diqqətdə saxlayan Heydər Əliyev Fondu bu istiqamətdə mütəmadi olaraq müxtəlif layihələr həyata keçirir. Mehriban xanım Əliyeva öz xeyriyyəçilik fəaliyyəti ilə gələcək nəsillərə nəcib bir yolun əsas konturlarını göstərir. Artıq ictimai həyatımızda xüsusi yer tutan xeyriyyəçilik institutu müasir dövrün reallıqları və tələblərinə uyğun olaraq inkişaf etməkdə və genişlənməkdədir. Bu təşəbbüslər yalnız sosial rifahın yüksəldilməsinə deyil, həm də Azərbaycan cəmiyyətində humanist dəyərlərin qorunmasına və geniş yayılmasına xidmət edir. Birinci xanımın rəhbərliyi altında Heydər Əliyev Fondu tərəfindən reallaşdırılan layihələr insansevərlik, mərhəmət və xeyirxahlıq kimi prinsiplərin cəmiyyətdə nümunəvi şəkildə tətbiqini təmin edir və gələcək nəsillər üçün örnək rolunu oynayır.
Azərbaycan həqiqətlərinin, mədəniyyətimizin, dövlətçilik ənənələrimizin, tariximizin dünyada təbliği sahəsində Mehriban xanımın təşəbbüsü ilə məqsədyönlü iş aparılır. 2020-ci ilin sentyabrında başlayan Vətən müharibəsinin gedişində Azərbaycanın haqlı mövqeyinin nümayişi, beynəlxalq hüququn norma və prinsiplərini kobud şəkildə pozan düşmənin dinc sakinləri hədəf alan hücumlarının beynəlxalq ictimaiyyətə çatdırılması istiqamətində əməli addımlar atılıb. Mötəbər beynəlxalq qurumlarda, dünyanın müxtəlif ölkələrində sərgilər, mədəniyyət gecələri və digər tədbirlər təşkil olunub. Avropa Parlamentinin mənzil-iqamətgahında, Afinada, Kannda Azərbaycan mədəniyyəti günləri keçirilib, Parisdə Azərbaycan Mədəniyyət Mərkəzi açılıb, dünyanın müxtəlif şəhərlərində görkəmli şəxsiyyətlərimizin abidələri ucaldılıb.
Azərbaycanın böyük uğurla ev sahibliyi etdiyi “Eurovision” beynəlxalq mahnı müsabiqəsi, Formula 1, Birinci Avropa Oyunları və IV İslam Həmrəyliyi Oyunları birinci xanım Mehriban Əliyevanın yüksək təşkilatçılıq bacarığını açıq şəkildə göstərdi. Bu mötəbər beynəlxalq tədbirlərin mükəmməl təşkili hətta inkişaf etmiş ölkələr tərəfindən də böyük heyranlıqla qarşılandı. Təsadüfi deyil ki, Mehriban xanım idman aləmində və “Ədalətli oyunlar” prinsipinin təbliğində nümunəvi fəaliyyətinə görə Beynəlxalq Ədalətli Oyunlar Komitəsinin “Xüsusi xidmətlərə görə” medalına layiq görülüb.
Bu cür uğurla ev sahibliyi etdiyimiz tədbirlər sırasında COP29-u da qeyd etmək olar. Həmin tədbir çərçivəsində birinci xanımların iştirakı ilə “Gənclər iqlim fəaliyyətlərinin ön cəbhəsində” mövzusunda konfrans keçirilib. Mehriban Əliyevanın təşəbbüsü və iştirakı ilə təşkil olunan bu konfrans gənclərin ekoloji maariflənməsi və iqlim dəyişikliyinə qarşı mübarizədə aktiv rol almaları üçün əhəmiyyətli platforma yaradıb.
Birinci xanımın çoxşaxəli fəaliyyəti təkcə Azərbaycanla məhdudlaşmır, ölkəmizin hüdudlarını aşaraq yaxın və uzaq xaricdə geniş əks-səda doğurur. Onun təşəbbüsü ilə Heydər Əliyev Fondu Vatikanda, Fransa, Pakistan, Bosniya və Herseqovina, Misir, Hindistan və digər ölkələrdə bir sıra önəmli layihələr icra edib.
Mehriban Əliyevanın xoşməramlı fəaliyyəti həm Azərbaycanda, həm də beynəlxalq miqyasda yüksək qiymətləndirilir. Azərbaycanın ən ali dövlət mükafatı olan “Heydər Əliyev” ordeni, eləcə də “Qızıl ürək” beynəlxalq mükafatı, Avropa Olimpiya Komitələrinin Ali ordeni, Fransanın “Şərəf Legionu” ordeni, İtaliyanın “Xidmətlərə görə” Böyük Xaç Kavaleri ordeni, Polşanın “Böyük Komandor Xaçı” ordeni, Rusiyanın “Dostluq” ordeni, UNESCO-nun “Qızıl Motsart” medalı... Bu, Azərbaycanın Birinci vitse-prezidentinin layiq görüldüyü mükafatların heç də tam siyahısı deyil. Mehriban Əliyeva hesab edir ki, ən böyük mükafatı xalqın ona olan sevgisi, inamı və etimadıdır. Onun dediyi kimi, “illər ötdükcə, qarşımıza yeni ideya və planlar çıxdıqca, məqsədlərimiz xaraktercə dəyişir, amma əsas amalımız - Azərbaycan xalqına xidmət etmək amalı dəyişməz olaraq qalır və qalacaqdır”.
Mehriban xanım elə bu amalla da öz ömür kitabını yazmaqda davam edir, onu gündən-günə, ildən-ilə yeni parlaq və mənalı səhifələrlə zənginləşdirir.
Millətin heysiyyətini ucaldan, mədəniyyətimizi dünyaya tanıdan Birinci xanım Mehriban Əliyeva üçün Özəl Gün
O, ölkəmizin hər yerdə haqq səsi, köklü mədəniyyətimizin gerçək hamisi, Azərbaycan qadınının əsl və əsil siması, düşmənin haqqımızda uydurduğu yalançı və qara mifləri zamanla kökündən yox edən, dünyada bizi olduğumuz kimi tanıtdıran, yəni, zəngin dəyərlərə və tarixə malik olan millət kimi qəbul etdirən bacarıqlı dövlət xadimi, siyasətçidir. Azərbaycanın Birinci vitse-prezidenti, Birinci xanım, Heydər Əliyev Fondunun prezidenti, İSESCO-nun xoşməramlı səfiri Mehriban xanım Əliyevanın bu titulları və vəzifələrinin hər biri əlbəttə ki, xalqımıza xidmətə həsr olunub. O, xalqımıza qarşı haqsızlığa dözməyərək UNESCO-nun xoşməramlı səfiri adından imtina edən zaman yenə də bu yolla öz millətinin qeyrətli qızı olduğunu sübut etdi və Azərbaycana qüsursuz xidmət etmək yolunu üstün tutdu. Bu addımı ilə dünya və o cümlədən də UNESCO-ya göstərdi ki, onun üçün xalqının, vətəninin mənafeyi və heysiyyəti hər bir uca tituldan və vəzifədən daha üstündür və əzizdir.
Şübhəsiz ki, Azərbaycan Anası müqəddəs addır. Mehriban xanım həm də qayğıkeş Azərbaycan Anasıdır. Özü də o, təkcə öz övladlarının deyil, hər kəsin, özəlliklə də möhtacı olanların hər birinin Anasıdır. Bu illərdə onun rəhbərlik etdiyi Heydər Əliyev Fondu imkansız insanlara maddi-mənəvi dəstək olub, ağır xəstələrin sağalmasına köməklik göstərib, şəhid ailələrinə, qazilərə öz qayğısını əsirgəməyib. Mehriban xanımın təşəbbüsü ilə uşaq evləri, məktəblər, məscidlər tikilib və ya əsaslı təmir olunub. Vandal ermənilərin viran qoyduğu, işğaldan azad olunmuş şəhər və kəndlərimizdə Heydər Əliyev Fondunun gördüyü quruculuq işləri tarix boyu unudulmayacaq. Çünki bu işlər mükəmməldir və vətənə xidmətin parlaq nümunəsidir.
Mən həm də Mehriban xanımın mədəniyyətimiz qarşısındakı xidmətləri barəsində fikir bildirmək istəyirəm. Bilirsiniz, Azərbaycanın tarixi çox qədim, mədəniyyəti, musiqisi, mətbəxi, ümumiyyətlə dəyərləri çox zəngindir. Ancaq o da faktdır ki, dünya bizi bu mənada yetərincə tanımırdı. Obrazlı desək, o zənginlik qiymətli kitablar kimi rəflərdə idi. Mehriban xanım o zənginliyi rəflərdən endirib dünyaya nümayiş etdirdi. Dünyanın dörd bir tərəfində onun təşəbbüsü ilə Azərbaycanı bu anlamda tanıdan tədbirlər heç şübhəsiz ki, çox böyük effekt verdi. Yumşaq gücdən məharətlə istifadə edən Heydər Əliyev Fondu mənfur düşmənin bizi vəhşi xalq kimi təqdim edən, illərlə apardığı qara propaqandaya kökündən, sarsıdıcı zərbə endirib, onu zəiflədib, zamanla yox etdi. Bunlar onun təkcə bu gün deyil, tarix və gələcək nəsillər üçün misilsiz xidmətləridir və əsla unudulmayacaq. II Qarabağ müharibəsi, Vətən savaşı apardığımız o şanlı günlərdə ermənilər nə qədər çalışsalar da bizi dünyada vəhşi xalq kimi tanıtdıra bilmədilər. Sadəcə bacarmadılar. Çünki o zamana qədər Heydər Əliyev Fondu, dövlətimiz bu qara propaqandaya böyük və sarsıdıcı zərbələr endirmişdi. Daha dünyada heç kim erməninin və rüşvətxor lobbiçilərin uydurduğu “onlar vəhşi müsəlman türklərdir” sözlərini ciddiyə almadı. Bu ona görə mümkün oldu ki, ona qədər çox böyük işlər görülmüş və dünya bizi yaxşı tanımışdı. Mehriban xanım hər zaman Millətimizin Lideri, cənab Prezident İlham Əliyevin ən yaxın silahdaşıdır. Mən çox xoşbəxtəm ki, xalqımızı, Azərbaycanımızı dünyada tanıdan tədbirlərin bir çoxunun canlı şahidi olmuşam. Yaxşı xatırlayıram, Fransanın Konyak şəhərində Məhsəti Gəncəvinin abidəsinin açılış mərasimində bir fransız yazıçısı və ziyalısı Heydər Əliyev Fondunun, əlbəttə ki, onun prezidenti Mehriban xanımın təşəbbüsü ilə fransızcaya tərcümə olunmuş Məhsəti xanımın rübailərini ucadan oxudu və ardınca da bu sözləri dedi: “Azərbaycan şairəsi yaşadığı dövrdə bu qədər dərin, fəlsəfi məzmunu zəngin olan əsərlər yaradıb. Biz fransızlar siz azərbaycanlılardan çox-çox gec, yüzillər sonra bu dəyərlərə gəlib çatmışıq. Siz gerçəkdən də böyük xalqsınız. Sizin bu mənada qürur duymağa haqqınız çatır. Sizi təbrik edirəm!”
“Qafqazın mirvarisi olan Azərbaycanın mədəni dəyərləri” layihəsi Heydər Əliyev Fondunun şah əsər mahiyyətli layihələrindən biridir ki, bizi dünyaya böyük dəyərlərə malik millət kimi tanıtdı. Bütün dünya azərbaycanlılarını… Bu gün bu böyük xidmətləri bu xalqa göstərən Mehriban xanım Əliyevanın doğum günüdür. Dünyanın dörd bir tərəfində yaşayan hər bir azərbaycanlının, o cümlədən milliyyətindən, irqindən, dini mənsubiyyətindən asılı olmayaraq insanların dərin rəğbətini, hörmətini, sevgisini qazanmış Azərbaycanın böyük dövlət xadimi Mehriban xanım Əliyevaya bu gün doğum günü münasibətilə təbriklər gəlir. Əlbəttə, biz də Mehriban xanıma ən səmimi təbriklərimizi çatdırır, möhkəm cansağlığı, vətənə, xalqa və insanlığa xidmət yolunda daha böyük uğurlar, səadət dolu günlər arzulayırıq. Allah Sizi qorusun!
Elnar Məmmədli
Politoloq
